पोखरा अन्तर्राष्ट्रिय विमानस्थलकाे उद्घाटन आज हुँदै

पोखरा : पोखरा अन्तर्राष्ट्रिय विमानस्थल प्रधानमन्त्री पुष्पकमल दाहालले अंग्रेजी नयाँ वर्षका दिन आइतबार उद्घाटन गर्दै छन्। नयाँ अन्तर्राष्ट्रिय विमानस्थल नियमित सञ्चालन र उद्घाटनका लागि सबै तयारी पूरा भएको पोखरा अन्तर्राष्ट्रिय विमानस्थल प्रमुखले बताए।

विमानस्थल सञ्चालनमा आए पनि अन्तर्राष्ट्रिय उडान कहिलेबाट सुरु हुने हो भन्ने यकिन भएको छैन् । आन्तरिक उडान भने आइतबारदेखि सुरु हुने छ। अन्तर्राष्ट्रिय उडानका लागि बुद्ध एयरले भारतका विभिन्न सहरमा उडान भर्न भारत सरकारसँग अनुमति मागेपनि अहिलेसम्म त्यसको रेस्पोन्स नआएको गौतमले जानकारी दिए। योसँगै उद्घाटनका दिन पोखरा–बनारस–पोखरा उडान गर्ने बुद्धको योजना पुरा हुन सकेन।

उद्घाटन समारोहमा कार्यक्रम नागरिक उड्डयन प्राधिकरणले गर्ने तथा जनसहभागिता र प्रचारप्रसारको जिम्मा पोखरा महानगरपालिकाले लिएको महानगर प्रमुख धनराज आचार्यले बताए। करिब पाँच दशकदेखिको पोखरेलीको अन्तर्राष्ट्रिय विमानस्थल सञ्चालन हुनुपर्ने  सपना पुरा भएको दिनलाई विशेष बनाउन महानगरले सार्वजनिक बिदा दिने भएको छ ।