बारा ३ मा एमाले उम्मेदवार साह निर्वाचित

बारा – बारा  निर्वाचन क्षेत्र नं ३ मा  एमाले उम्मेदवार  ज्वालाकुमारी साह निर्वाचित भएकी छिन् । साहले २० हजार २५१ मत ल्याउँदा उनका निकटतम् प्रतिस्पर्धी जनता समाजवादी पार्टीका उम्मेदवार रामबाबु कुमार यादवले १७ हजार २६९ मत प्राप्त गरेका छन् । एमाले उम्मेदवार साहले यादवलाई २ हजार ९८२ मतान्तरले पराजित गरेकी हुन् ।

बाराको ४ वटा प्रतिनिधि र ८ वटा प्रदेशसभा सदस्य निर्वाचन क्षेत्रमा साह निर्वाचित हुने पहिलो महिला हुन् । २०७४ को निर्वाचनमा तत्कालीन माओवादी केन्द्रबाट बारा ३ (क) प्रदेशसभा सदस्यमा निर्वाचित भएकी साहले  बहालवाला प्रदेशसभा सदस्य पद रहँदैमा एमाले पार्टी प्रवेश गरेकी थिइन् ।

आसन्न निर्वाचनमा मधेशप्रदेशका ८ जिल्लामा एमाले जसपा उम्मेदवारबीच गठबन्धन हुदाँ बारा ३ मा भने एमाले उम्मेदवार साह र जसपा उम्मेदवार यादवबीच मित्रवत् प्रतिस्पर्धा भएको थियो । जसपा उम्मेदवार यादव बारा ३ को बहालवाला संघीय सांसद  र जसपा मधेशप्रदेश अध्यक्ष समेत हुन् । सो निर्वाचन क्षेत्रमा सत्ता गठबन्धनका उम्मेदवार लालबाबु सिंहले भने ११ हजार ९६४ मत प्राप्त गरेका छन् ।

बारा निर्वाचन क्षेत्र नं ३ मा १ लाख ३ हजार १४८ मतदाता रहेका छन् । सो क्षेत्रमा ६६ हजार ९६६ मत खसेकोमा ३ हजार ३५१ मत बदर भएको निर्वाचन कार्यलयले जनाएको छ ।